ԱԲ սերունդ

«ԱԲ սերունդ» դպրոցական ծրագիրը մշակվել է Հայաստանի գիտության և տեխնոլոգիաների հիմնադրամի (FAST) կողմից և իրականացվում է ՀՀ ԿԳՄՍ նախարարության, ոլորտի կառույցների ու մասնավոր հատվածի համագործակցությամբ։ Ծրագիրը նախատեսված է 10-12-րդ դասարանների աշակերտների համար և նպատակ ունի ձևավորել խորացված մաթեմատիկայի, համակարգչային գիտության և արհեստական բանականության (ԱԲ) հիմնարար գիտելիքներ ու հմտություններ։ Ուսումնական գործընթացում աշակերտները սովորում են Python ծրագրավորում, զարգացնում են թվային գրագիտություն, ինչպես նաև իրականացնում են պրակտիկ նախագծեր ԱԲ ոլորտում։

Դասավանդման գործընթացում ներգրավված են ինչպես դպրոցի ուսուցիչները, այնպես էլ ոլորտի մասնագետներ, որոնք դասավանդում են հիբրիդային ձևաչափով։ Ուսուցիչներն ու մասնագետները պարբերաբար անցնում են վերապատրաստումներ՝ ապահովելով դասավանդման բարձր որակ։